احنا بجد فخورين جداااااااااااااااااااا

وفاة الثانوية العامة

طالب حاصل على 52% في الثانوية العامة طلع الأول في اختبارات التقدم لكلية الإعلام بالتعليم المفتوح..لحد كده عادى.. بس اللى مش عادى ان الأخير جايب 5ر86%..دلوقتى بس نقدر نقرا الفاتحة على روح الثانوية العامة ولا عزاء لأصحاب المجاميع الكبيرة وكليات القمة


تصريحات رمضانية

أتعودنا قبل رمضان وزى كل سنة على مجموعة من التصريحات الحكومية اللي تشرح القلب ..الأسعار مش هتزيد وهنستورد لحمة والكيلو ب25 جنيه، والمرور هيبقى زى الفل ومفيش زحمة.. والله الناس حفظت الكلام ده بس ناقص حاجة واحدة ..انه يتنفذ..وكل سنة وانتو طيبين

اهانات

مروة الشربيني اتقتل في المانيا عشان محجبة، والرئيس السادات اتهان في فيلم امريكي، ومشجعي نادي شالكة الالماني بيسئوا للرسول، والسفارات الأوربية بتهين المصريين في القاهرة .. هي الناس دي مش لاقية حد يلمها ولا أيه؟

تربية السلاحف

الحكومة اعلنت عن مشروع لتربية السلاحف بتمويل عربي ودولي هايتكلف 280 مليون جنيه تقريبا، شوفوا انتو بقى المبلغ ده كان ممكن يبني كام شقة ولا يوفر كام وظيفة .. ليه يا رب ما خلقتنيش زحلفة


تلوث المياه فى القليوبية


بعد انتشار مرض التيفود ..الرئيس مبارك سأل وزير الإسكان عن مشكلة تلوث المياه ، فطبعا رد عليه الوزير وقاله ان المياه نضيفه وزى الفل يا ريس .. واحد صاحبي قالي ان المشكلة مش عند الحكومة ولا فى المياه، هيه المشكلة ان الناس ما عندهاش ميه أصلا


نية عز


يا أخي احمد عز ده في شيء لله، الراجل يا دوب قال تصريحه بتاع رفاهية المصريين من هنا ويقوم ربك باعتله نتيجة استطلاع دولي بيأكد ان المصريين اكتر شعب في العالم ساخط على اوضاعه المالية .. روح يا شيخ ربنا يديلك على قد نيتك كمان وكمان.


التدخل الخارجي

احمد عز بيقول ان السيارات الفارهة والمحمول دليل على رفاهية مصر، ونحن بدورنا كمصريين نرفض التدخل الخارجي ونطالب عز وحزبه وحكومته بعدم التدخل في شئون مصر واصدار تصاريح كاذبة عن بلادنا، ونطالبهم بالاهتمام ببلدهم ومصالحهم فقط.

يا شباب


الخارجية بتحذر الشباب المصري من عواقب الهجرة غير الشرعية لأوروبا عبر أوكرانيا .. قصدها يعني يا شباب تشوفوا دولة تانية تهاجروا منها لأوروبا.


نقل الحديقة


الحكومة قررت نقل حديقة حيوان الجيزة إلى مدينة 6 أكتوبر وبيع ارضها للمستثمرين .. الحمد لله ان الزرافة ماتت قبل ما تشوف اليوم ده

مساااااااء الخييييييييير

مساء الخييييييييير .. الحكومة استوردت 13 الف طن ذرة فيها بذور حشيش .. ويبقى كدة الحكومة مش حرمانا من حاجة .. بتأكلنا وتكيفنا .. ربنا يخليكى لينا يا حكومتنا يا ام دماغ عالية يامظبطانا